ai mahw-e-naz mera jahan ek nazar to dekh

ai mahv-e-nāz merā jahāñ ik nazar to dekh

hotī hai kis tarah shab-e-ġham kī sahar to dekh

ye kyā kahā ki koī nahīñ qadr-dāñ mirā

tujh ko qasam hai merī taraf ik nazar to dekh

chhā.ī hai bazm-e-husn meñ ab bhī fasurdagī

pahuñchā kahāñ talak ġham-e-dil kā asar to dekh

manzil kā hosh hai na hai kuchh raah kī ḳhabar

kitnā ajiib hai ye hamārā safar to dekh

uljhā huā hai zulf meñ aariz pe kar nazar

dekhā kiyā hai shaam zarā ab sahar to dekh

ai ham-nafas sahar se mirā dil hai be-qarār

laa.ī sabā kisī kī ho shāyad ḳhabar to dekh

maanā ki rāsta hai bahut pur-ḳhatar magar

'najma' na ho udaas sū-e-rāhbar to dekh

ai mahw-e-naz mera jahan ek nazar to dekh

hoti hai kis tarah shab-e-gham ki sahar to dekh

ye kya kaha ki koi nahin qadr-dan mera

tujh ko qasam hai meri taraf ek nazar to dekh

chhai hai bazm-e-husn mein ab bhi fasurdagi

pahuncha kahan talak gham-e-dil ka asar to dekh

manzil ka hosh hai na hai kuchh rah ki KHabar

kitna ajib hai ye hamara safar to dekh

uljha hua hai zulf mein aariz pe kar nazar

dekha kiya hai sham zara ab sahar to dekh

ai ham-nafas sahar se mera dil hai be-qarar

lai saba kisi ki ho shayad KHabar to dekh

mana ki rasta hai bahut pur-KHatar magar

'najma' na ho udas su-e-rahbar to dekh