ai mahw-e-raqs nach abhi aur nach aur

ai mahv-e-raqs naach abhī aur naach aur

is sar-phirī zamīn kī himmat ko jāñch aur

ham rāh-e-'ishq-e-haq ke musāfir haiñ so huzūr

kāñToñ ke saath Dāliye kuchh kāñch-vāñch aur

ai bulbul-e-asīr-e-qafas yā'nī dard-e-dil

zanjīr-e-pā-e-sabr na tū khīñch-khāñch aur

phir shāfe'-e-ġhazāl-o-ġhazal par maiñ kuchh kahūñ

mil jaa.eñ lafz ḳhuub agar chaar pāñch aur

hai muflisī qusūr to maiñ huuñ qusūr-vār

dozaḳh baḌhā sake to baḌhā apnī aañch aur

āñkhoñ meñ aaj dard kī qillat hai bevafā

phir in meñ aaj Daal de pighlā ke kāñch aur

'tāhir' ġhazal ko aur abhī saaf kījiye

makkhan se kuchh nikāliye thoḌī sī chhāch aur

ai mahw-e-raqs nach abhi aur nach aur

is sar-phiri zamin ki himmat ko jaanch aur

hum rah-e-'ishq-e-haq ke musafir hain so huzur

kanTon ke sath Daliye kuchh kanch-wanch aur

ai bulbul-e-asir-e-qafas ya'ni dard-e-dil

zanjir-e-pa-e-sabr na tu khinch-khanch aur

phir shafe'-e-ghazal-o-ghazal par main kuchh kahun

mil jaen lafz KHub agar chaar panch aur

hai muflisi qusur to main hun qusur-war

dozaKH baDha sake to baDha apni aanch aur

aankhon mein aaj dard ki qillat hai bewafa

phir in mein aaj Dal de pighla ke kanch aur

'tahir' ghazal ko aur abhi saf kijiye

makkhan se kuchh nikaliye thoDi si chhach aur