ai mauja-e-sarab tu phankegi kitni KHak

ai mauja-e-sarāb tū phāñkegī kitnī ḳhaak

mujh ko Dubone ke liye chhānegī kitnī ḳhaak

bach jaa.e musht-bhar sahī dafnāne ke liye

mauj-e-balā-e-ishq meñ Dūbegī kitnī ḳhaak

kitne hasīn ḳhvāb taraste haiñ diid ko

ā.īna-e-jamāl pe baiThegī kitnī ḳhaak

jis ke dar-o-darīcha-o-dīvār haiñ tabāh

is ḳhāna-e-sukūt ko pūchhegī kitnī ḳhaak

koī to chāhiye hadd-e-ḳhsuh-famī-e-fareb

duniyā tū merī aañkh meñ jhoñkegī kitnī ḳhaak

kyuuñ jhuk ga.ī hai bojh se tū āsmān ke

ab sar uThā ai zindagī chāTegī kitnī ḳhaak

mālan gulāb dafn bhī gul-dān meñ hue

bhar bhar ke muTThiyāñ abhī Dālegī kitnī ḳhaak

kab tak 'shafaq' chalegī ye āñdhī malāl kī

mere udaas baam pe barsegī kitnī ḳhaak

ai mauja-e-sarab tu phankegi kitni KHak

mujh ko Dubone ke liye chhanegi kitni KHak

bach jae musht-bhar sahi dafnane ke liye

mauj-e-bala-e-ishq mein Dubegi kitni KHak

kitne hasin KHwab taraste hain did ko

aaina-e-jamal pe baiThegi kitni KHak

jis ke dar-o-daricha-o-diwar hain tabah

is KHana-e-sukut ko puchhegi kitni KHak

koi to chahiye hadd-e-KHsuh-fami-e-fareb

duniya tu meri aankh mein jhonkegi kitni KHak

kyun jhuk gai hai bojh se tu aasman ke

ab sar uTha ai zindagi chaTegi kitni KHak

malan gulab dafn bhi gul-dan mein hue

bhar bhar ke muTThiyan abhi Dalegi kitni KHak

kab tak 'shafaq' chalegi ye aandhi malal ki

mere udas baam pe barsegi kitni KHak