ai mere ishq mujhe aur be-qarar na kar

ai mere ishq mujhe aur be-qarār na kar

vo bevafā hai mohabbat kī had ko paar na kar

baġhaur dekh mujhe tū ai sang-dil duniyā

maiñ ek phuul huuñ is tarah sañgsār na kar

vo bevafā hai nahīñ jab use koī parvāh

to apne zehn pe tū bhī use savār na kar

ajab ye dil hai nahīñ māntā mirā kahnā

maiñ us se roz ye kahtā huuñ intizār na kar

maiñ aaj us ke ḳhayāloñ meñ jiinā chāhtā huuñ

ki aaj mujh ko pareshān mere yaar na kar

ġhamoñ se chaak garebāñ hai ai sharar 'naqvī'

koī ye us se kahe aur taar taar na kar

ai mere ishq mujhe aur be-qarar na kar

wo bewafa hai mohabbat ki had ko par na kar

baghaur dekh mujhe tu ai sang-dil duniya

main ek phul hun is tarah sangsar na kar

wo bewafa hai nahin jab use koi parwah

to apne zehn pe tu bhi use sawar na kar

ajab ye dil hai nahin manta mera kahna

main us se roz ye kahta hun intizar na kar

main aaj us ke KHayalon mein jina chahta hun

ki aaj mujh ko pareshan mere yar na kar

ghamon se chaak gareban hai ai sharar 'naqwi'

koi ye us se kahe aur tar tar na kar