ai mere yar waqt lagta hai

ai mire yaar vaqt lagtā hai

pyaar hai pyaar vaqt lagtā hai

pyaar meñ sabr bhī zarūrī hai

hogā iz.hār vaqt lagtā hai

dil meñ aise jagah nahīñ miltī

mere sarkār vaqt lagtā hai

rañg apnā dikhā.eñge ik din

gul hoñ yā ḳhaar vaqt lagtā hai

un kī zulfoñ ke jaal meñ mujrim

ho giraftār vaqt lagtā hai

tere pīchhe chalegā ḳhush ho kar

saarā sansār vaqt lagtā hai

pārsā aise kaise ho jaa.e

ik gunahgār vaqt lagtā hai

mujh se milne ko mere ḳhvāboñ meñ

tujh ko har baar vaqt lagtā hai

log jis kī misāl dete raheñ

ho vo kirdār vaqt lagtā hai

kyā huā kyoñ ulajh ga.e 'kāshif'

hoñge ash.ār vaqt lagtā hai

ai mere yar waqt lagta hai

pyar hai pyar waqt lagta hai

pyar mein sabr bhi zaruri hai

hoga izhaar waqt lagta hai

dil mein aise jagah nahin milti

mere sarkar waqt lagta hai

rang apna dikhaenge ek din

gul hon ya KHar waqt lagta hai

un ki zulfon ke jal mein mujrim

ho giraftar waqt lagta hai

tere pichhe chalega KHush ho kar

sara sansar waqt lagta hai

parsa aise kaise ho jae

ek gunahgar waqt lagta hai

mujh se milne ko mere KHwabon mein

tujh ko har bar waqt lagta hai

log jis ki misal dete rahen

ho wo kirdar waqt lagta hai

kya hua kyon ulajh gae 'kashif'

honge ashaar waqt lagta hai