ai nang-e-ishq baz bhi aa aah aah se

ai nañg-e-ishq baaz bhī aa aah aah se

vo hashr-e-rañg rañg uThā jalva-gāh se

uTho ki dil ko tamkanat-e-ishq par hai zo.am

ulTo naqāb aag lagā do nigāh se

begāna-vār ishq kī manzil ko tai kiyā

bach kar chalā maiñ ḳhār-o-ḳhas-e-rasm-o-rāh se

vo ġham to de ki fursat-e-yak-lahza ho muhāl

sharminda ho rahā huuñ ġham-e-gāh-gāh se

us ko na ho sakī kahīñ āsūdgī nasīb

dil thaam kar uThā jo tirī bārgāh se

is bāryāb-e-husn kī uftādgī na pūchh

jo gir gayā nigāh meñ rah kar nigāh se

ai nang-e-ishq baz bhi aa aah aah se

wo hashr-e-rang rang uTha jalwa-gah se

uTho ki dil ko tamkanat-e-ishq par hai zoam

ulTo naqab aag laga do nigah se

begana-war ishq ki manzil ko tai kiya

bach kar chala main KHar-o-KHas-e-rasm-o-rah se

wo gham to de ki fursat-e-yak-lahza ho muhaal

sharminda ho raha hun gham-e-gah-gah se

us ko na ho saki kahin aasudgi nasib

dil tham kar uTha jo teri bargah se

is baryab-e-husn ki uftadgi na puchh

jo gir gaya nigah mein rah kar nigah se