ai nigar-e-zindagi tujhko kahan DhunDha nahin

ai nigār-e-zindagī tujh ko kahāñ DhūñDhā nahīñ

ab ye aalam hai ki apnā bhī pata miltā nahīñ

yuuñ asīr-e-dard-e-paiham ho chukī hai zindagī

jis ko apnā kah sakūñ aisā koī lamha nahīñ

chand lamhoñ ko milī thī kal mujhe zulfoñ kī chhāñv

reg-zār-e-zīst meñ ab duur tak saaya nahīñ

mas.ala tanhā.ī kā hal kar diyā is daur ne

itne ġham haiñ zindagī meñ aadmī tanhā nahīñ

is meñ saḳhtī bhī sahī narmī bhī hiddat bhī sahī

dil magar patthar nahīñ shabnam nahīñ sho.ala nahīñ

vārdāt-e-yūrish-e-ġham kis jagah hogī raqam

ab kitāb-e-zīst kā koī varaq saadā nahīñ

ġhair hone par bhī us ke dil meñ hai kitnā ḳhulūs

kis zabāñ se maiñ kahūñ vo aadmī apnā nahīñ

haa.e vo ik aarzū jo dil meñ ghuT kar mar ga.ī

haa.e vo aañsū jo merī aañkh se Tapkā nahīñ

is tarah uljhā huā hai apne ġham meñ aadmī

dūsroñ ke dard kā kuchh us ko andāza nahīñ

dekh kar us ko na jaane kis kī yaad aane lagī

parda-e-taḳh.ēl par aisā koī chehrā nahīñ

vo jo qātil thā vahī 'mehdī' masīhā ban gayā

aisī dohrī shaḳhsiyat kā aadmī dekhā nahīñ

ai nigar-e-zindagi tujh ko kahan DhunDha nahin

ab ye aalam hai ki apna bhi pata milta nahin

yun asir-e-dard-e-paiham ho chuki hai zindagi

jis ko apna kah sakun aisa koi lamha nahin

chand lamhon ko mili thi kal mujhe zulfon ki chhanw

reg-zar-e-zist mein ab dur tak saya nahin

masala tanhai ka hal kar diya is daur ne

itne gham hain zindagi mein aadmi tanha nahin

is mein saKHti bhi sahi narmi bhi hiddat bhi sahi

dil magar patthar nahin shabnam nahin shoala nahin

wardat-e-yurish-e-gham kis jagah hogi raqam

ab kitab-e-zist ka koi waraq sada nahin

ghair hone par bhi us ke dil mein hai kitna KHulus

kis zaban se main kahun wo aadmi apna nahin

hae wo ek aarzu jo dil mein ghuT kar mar gai

hae wo aansu jo meri aankh se Tapka nahin

is tarah uljha hua hai apne gham mein aadmi

dusron ke dard ka kuchh us ko andaza nahin

dekh kar us ko na jaane kis ki yaad aane lagi

parda-e-taKHeel par aisa koi chehra nahin

wo jo qatil tha wahi 'mehdi' masiha ban gaya

aisi dohri shaKHsiyat ka aadmi dekha nahin