ai rashk-e-gul-e-tar tu kabhi dekh idhar bhi

ai rashk-e-gul-e-tar tū kabhī dekh idhar bhī

kaafī hai mire dil pe tirī ek nazar bhī

ai jān-e-jahāñ terā pata ḳhaak lagā.eñ

jab ham ko mohabbat meñ nahīñ apnī ḳhabar bhī

ik umr se ham kushta-e-ālām-o-sitam haiñ

ho jaa.e kabhī ham pe ināyat kī nazar bhī

vo mil na sake ham ko kahīñ dasht-o-jabal meñ

DhūñDā hai unheñ ham ne sar-e-rāhguzar bhī

ham husn ke bande haiñ parastār-e-mohabbat

pā.eñge hameñ aap chale jaa.eñ jidhar bhī

go tishna-dahan muhr-ba-lab baiThe haiñ saaqī

ham bhī tire bande haiñ koī jaam idhar bhī

vo apnī jafāoñ pe pashemān hai 'rahbar'

ma.asūm sī āñkhoñ meñ hai shabnam bhī sharar bhī

ai rashk-e-gul-e-tar tu kabhi dekh idhar bhi

kafi hai mere dil pe teri ek nazar bhi

ai jaan-e-jahan tera pata KHak lagaen

jab hum ko mohabbat mein nahin apni KHabar bhi

ek umr se hum kushta-e-alam-o-sitam hain

ho jae kabhi hum pe inayat ki nazar bhi

wo mil na sake hum ko kahin dasht-o-jabal mein

DhunDa hai unhen hum ne sar-e-rahguzar bhi

hum husn ke bande hain parastar-e-mohabbat

paenge hamein aap chale jaen jidhar bhi

go tishna-dahan muhr-ba-lab baiThe hain saqi

hum bhi tere bande hain koi jam idhar bhi

wo apni jafaon pe pasheman hai 'rahbar'

masum si aankhon mein hai shabnam bhi sharar bhi