ai sanam talib nahin wo KHuld se gulzar ka

ai sanam tālib nahīñ vo ḳhuld se gulzār kā

mubtalā ko chāhiye saaya tirī dīvār kā

mehmāñ hai koī dam kā yā koī saa.at kā vo

haal ab dekhā nahīñ jaatā tire bīmār kā

ḳhūbsūrat gauhar-e-ḳhush-āb kī har ik laḌī

silsila kaisā bañdhā hai āñsuoñ ke taar kā

ghar kiyā hai ai sanam us meñ tirī tasvīr ne

band honā ġhair-mumkin dīda-e-dīdār kā

zindagānī kā mazā kyā kyā nahīñ dikhlā gayā

is mire dil ke makāñ meñ chhup ke aanā yaar kā

kījiye nazr-e-butāñ ab shauq se īmān-o-dil

kyā pahannā sahl samjhā aap ne zunnār kā

khol kar pur-kaif āñkheñ dekhte haiñ vo idhar

lījiye vo khul gayā ab ḳhāna-e-ḳhummār kā

dekhne ko taab kyā ho tālib-e-dīdār kā

nuur se shams-o-qamar meñ tere hī ruḳhsār kā

āsiyoñ ke jurm ko vo hashr meñ ifshā kare

ai 'jamīla' kaam ye hargiz nahīñ hushiyār kā

ai sanam talib nahin wo KHuld se gulzar ka

mubtala ko chahiye saya teri diwar ka

mehman hai koi dam ka ya koi saat ka wo

haal ab dekha nahin jata tere bimar ka

KHubsurat gauhar-e-KHush-ab ki har ek laDi

silsila kaisa bandha hai aansuon ke tar ka

ghar kiya hai ai sanam us mein teri taswir ne

band hona ghair-mumkin dida-e-didar ka

zindagani ka maza kya kya nahin dikhla gaya

is mere dil ke makan mein chhup ke aana yar ka

kijiye nazr-e-butan ab shauq se iman-o-dil

kya pahanna sahl samjha aap ne zunnar ka

khol kar pur-kaif aankhen dekhte hain wo idhar

lijiye wo khul gaya ab KHana-e-KHummar ka

dekhne ko tab kya ho talib-e-didar ka

nur se shams-o-qamar mein tere hi ruKHsar ka

aasiyon ke jurm ko wo hashr mein ifsha kare

ai 'jamila' kaam ye hargiz nahin hushiyar ka