ai shaiKH teri pand-o-nasihat se kya hua

ai shaiḳh terī pand-o-nasīhat se kyā huā

kambaḳht chhūTtā hai kahīñ dil lagā huā

sharm-o-hayā ko chhoḌiye burqā uThā.iye

kab tak rahegā chāñd gahan meñ diyā huā

māñgā thā bosa aap se le to nahīñ liyā

barham ho kyoñ batā.iye nuqsān kyā huā

da.avā hamāre dil pe butoñ ko hai kis liye

kyā un ke haath bai.a huā yā hibā huā

bosa zarūr leñge kisī roz dekhnā

lab pe hai un ke daañt hamārā lagā huā

o but tirī ḳhudā.ī kā qissa sunā.ūñgā

allāh se jo hashr ke din sāmnā huā

ham ne nigāh pher ke dekhā jo ġhair ko

'kaifī' ke dil se pūchhiye anjām kyā huā

ai shaiKH teri pand-o-nasihat se kya hua

kambaKHt chhuTta hai kahin dil laga hua

sharm-o-haya ko chhoDiye burqa uThaiye

kab tak rahega chand gahan mein diya hua

manga tha bosa aap se le to nahin liya

barham ho kyon bataiye nuqsan kya hua

dawa hamare dil pe buton ko hai kis liye

kya un ke hath baia hua ya hiba hua

bosa zarur lenge kisi roz dekhna

lab pe hai un ke dant hamara laga hua

o but teri KHudai ka qissa sunaunga

allah se jo hashr ke din samna hua

hum ne nigah pher ke dekha jo ghair ko

'kaifi' ke dil se puchhiye anjam kya hua