اے شعلہ رخ اتنا ہے ترا رنگ بدن سرخ

اے شعلہ رخ اتنا ہے ترا رنگ بدن سرخ

پہنے ہے سفید اور نظر آتی ہے چکن سرخ

کیا تیرے شہیدوں میں ہوا خون لگا کر

کس واسطے ہے لالۂ حمرا ہمہ تن سرخ

نیلم ہے دھرا حقۂ یاقوت میں گویا

ہیں دانت سیہ مسی سے پاں سے ہے دہن سرخ

قطروں میں عرق کے ہے عیاں رنگ بدن کا

دیکھا نہ گیا آج تلک در عدن سرخ

کیوں کر دل خونی کو نگل جائیں نہ گیسو

ہوتا ہے کہا کرتے ہیں سب سانپ کا من سرخ

نازک تو ہے جسم اس کا مگر رنگ ہے لعلیں

وہ دیکھ لے جس نے کہ نہ دیکھا ہو سمن سرخ

زاہد تجھے گر سرخ رو ہونے کی ہوس ہے

کر دیتی ہے چہرہ کو مئے ناب کہن سرخ

کشتہ میں ہوا ہوں تری گل پیرہنی پر

لازم ہے مری لاش کو دیں لوگ کفن سرخ

مر کر بھی رہے خون کے اشک آنکھوں سے جاری

اے سحرؔ ملا ہجر کی دولت سے کفن سرخ