ai sim-tan tujhe gul-pairahan kaha jae

ai sīm-tan tujhe gul-pairahan kahā jaa.e

ki āftāb kī pahlī kiran kahā jaa.e

hukūmateñ ki jahāñ shah-garoñ kā ġhalba ho

is eqtidār ko dār-o-rasan kahā jaa.e

aziyyatoñ kā sila hai mahak uThīñ galiyāñ

hamāre zaḳhm ko mushk-e-ḳhutan kahā jaa.e

jise chhuā hai na dekhā nigāh-e-bātin ne

use ḳhayāl gumāñ yā badan kahā jaa.e

ye raushnī kā nagar sub.h shaam kyā ma.anī

barahna tan ko jahāñ pairahan kahā jaa.e

hamāre ahd ke sayyād ham se chāheñge

ki qatl-gāh ko apnā chaman kahā jaa.e

lagā de aag jo ḳhāmosh ābgīnoñ meñ

use hamārā hī tarz-e-suḳhan kahā jaa.e

vo jin kā qad se bhī ūñchā anā kā paikar ho

vo chāhte haiñ unheñ anjuman kahā jaa.e

hazār rang nasīboñ meñ bāñdh laa.e jo

use jahāñ meñ magar kohkan kahā jaa.e

vo raushnī kī talab meñ vahāñ talak pahuñche

jahāñ pe dhuup ko sāya-fagan kahā jaa.e

bujhā ke rakh de jo jalte hue charāġhoñ ko

to kyā ise bhī havā kā suḳhan kahā jaa.e

mashaqqateñ jo ayaañ hoñ udaas āñkhoñ se

unheñ ḳhumār kaheñ yā thakan kahā jaa.e

nikhar gayā ho koī husn jab pasīne meñ

use to sub.h kī pahlī kiran kahā jaa.e

hujūm-e-fikr meñ dil ko lahū lahū kar leñ

ġhazal meñ tab kahīñ ramz-e-suḳhan kahā jaa.e

haqīqateñ ki jo dekhī haiñ kitnī āñkhoñ ne

'nazar' kaheñ to ise sū-e-zan kahā jaa.e

ai sim-tan tujhe gul-pairahan kaha jae

ki aaftab ki pahli kiran kaha jae

hukumaten ki jahan shah-garon ka ghalba ho

is eqtidar ko dar-o-rasan kaha jae

aziyyaton ka sila hai mahak uThin galiyan

hamare zaKHm ko mushk-e-KHutan kaha jae

jise chhua hai na dekha nigah-e-baatin ne

use KHayal guman ya badan kaha jae

ye raushni ka nagar subh sham kya mani

barahna tan ko jahan pairahan kaha jae

hamare ahd ke sayyaad hum se chahenge

ki qatl-gah ko apna chaman kaha jae

laga de aag jo KHamosh aabginon mein

use hamara hi tarz-e-suKHan kaha jae

wo jin ka qad se bhi uncha ana ka paikar ho

wo chahte hain unhen anjuman kaha jae

hazar rang nasibon mein bandh lae jo

use jahan mein magar kohkan kaha jae

wo raushni ki talab mein wahan talak pahunche

jahan pe dhup ko saya-fagan kaha jae

bujha ke rakh de jo jalte hue charaghon ko

to kya ise bhi hawa ka suKHan kaha jae

mashaqqaten jo ayan hon udas aankhon se

unhen KHumar kahen ya thakan kaha jae

nikhar gaya ho koi husn jab pasine mein

use to subh ki pahli kiran kaha jae

hujum-e-fikr mein dil ko lahu lahu kar len

ghazal mein tab kahin ramz-e-suKHan kaha jae

haqiqaten ki jo dekhi hain kitni aankhon ne

'nazar' kahen to ise su-e-zan kaha jae