ai suḳhanvar tarah gumāñ huuñ maiñ
yā faqat harf-e-rā.egāñ huuñ maiñ
'aks jal bujh ga.e bujhā chehra
aa.ine se uThā dhuāñ huuñ maiñ
hai mayassar matā-e-tishna-labī
ḳhushk dariyā kā pāsbāñ huuñ maiñ
aag se bair dhuup bhī hai 'adū
aur ik mom kā makāñ huuñ maiñ
mushtarak ham meñ hijratoñ kī thakan
titliyoñ kā mizāj-dāñ huuñ maiñ
tajrbe kī ghanerī chhāñv liye
ek kohna sā sā.ebāñ huuñ maiñ
kab miTā de mujhe havā kī lakīr
rāh-rau ret par nishāñ huuñ maiñ
kal mirā vasf thā tarīq-e-sulūk
aaj be-nām be-nishāñ huuñ maiñ
shahr meñ harf-e-āshnā hī nahīñ
faiz kyā lafz be-karāñ huuñ maiñ
jo haqīqat the vo ga.e 'sābir'
ek mauhūm dāstāñ huuñ maiñ
ai suKHanwar tarah guman hun main
ya faqat harf-e-raegan hun main
'aks jal bujh gae bujha chehra
aaine se uTha dhuan hun main
hai mayassar mata-e-tishna-labi
KHushk dariya ka pasban hun main
aag se bair dhup bhi hai 'adu
aur ek mom ka makan hun main
mushtarak hum mein hijraton ki thakan
titliyon ka mizaj-dan hun main
tajrbe ki ghaneri chhanw liye
ek kohna sa saeban hun main
kab miTa de mujhe hawa ki lakir
rah-rau ret par nishan hun main
kal mera wasf tha tariq-e-suluk
aaj be-nam be-nishan hun main
shahr mein harf-e-ashna hi nahin
faiz kya lafz be-karan hun main
jo haqiqat the wo gae 'sabir'
ek mauhum dastan hun main
Additional information available
Click on the INTERESTING button to view additional information associated with this sher.
rare Unpublished content
This ghazal contains ashaar not published in the public domain. These are marked by a red line on the left.