ai waqt ham-qadam tere chalna na aa saka

ai vaqt ham-qadam tire chalnā na aa sakā

kyoñ mausamoñ ke saath badalnā na aa sakā

logoñ ne āsmāñ ke sitāroñ ko chhū liyā

ham ko rivāyatoñ se nikalnā na aa sakā

vo rahm kī nazar se hameñ dekhte hī kyoñ

dāman pakaḌ ke ham ko machalnā na aa sakā

ham apnī hājatoñ kī ġhulāmī meñ aa ga.e

zindāñ kī bandishoñ se nikalnā na aa sakā

vāqif the zindagī ke nasheb-o-farāz se

yuuñ halqa-e-ḳhudī se nikalnā na aa sakā

duniyā badal chukī hai ta.ayyush meñ zindagī

ham ko to ik nafas bhī badalnā na aa sakā

apnī nazar se gir ke sañbhal bhī ga.e to 'shād'

un kī nazar se gir ke sañbhalnā na aa sakā

ai waqt ham-qadam tere chalna na aa saka

kyon mausamon ke sath badalna na aa saka

logon ne aasman ke sitaron ko chhu liya

hum ko riwayaton se nikalna na aa saka

wo rahm ki nazar se hamein dekhte hi kyon

daman pakaD ke hum ko machalna na aa saka

hum apni hajaton ki ghulami mein aa gae

zindan ki bandishon se nikalna na aa saka

waqif the zindagi ke nasheb-o-faraaz se

yun halqa-e-KHudi se nikalna na aa saka

duniya badal chuki hai tayyush mein zindagi

hum ko to ek nafas bhi badalna na aa saka

apni nazar se gir ke sanbhal bhi gae to 'shad'

un ki nazar se gir ke sanbhalna na aa saka