اے وقت ہم قدم ترے چلنا نہ آ سکا

اے وقت ہم قدم ترے چلنا نہ آ سکا

کیوں موسموں کے ساتھ بدلنا نہ آ سکا

لوگوں نے آسماں کے ستاروں کو چھو لیا

ہم کو روایتوں سے نکلنا نہ آ سکا

وہ رحم کی نظر سے ہمیں دیکھتے ہی کیوں

دامن پکڑ کے ہم کو مچلنا نہ آ سکا

ہم اپنی حاجتوں کی غلامی میں آ گئے

زنداں کی بندشوں سے نکلنا نہ آ سکا

واقف تھے زندگی کے نشیب و فراز سے

یوں حلقۂ خودی سے نکلنا نہ آ سکا

دنیا بدل چکی ہے تعیش میں زندگی

ہم کو تو اک نفس بھی بدلنا نہ آ سکا

اپنی نظر سے گر کے سنبھل بھی گئے تو شادؔ

ان کی نظر سے گر کے سنبھلنا نہ آ سکا