ai waqt teri aankh ka kajal rahe hain hum

ai vaqt terī aañkh kā kājal rahe haiñ ham

har ek mas.ale kā tire hal rahe haiñ ham

manzil kī justujū kā ye aalam to dekhiye

sahrā hai tez dhuup hai aur chal rahe haiñ ham

hāthoñ meñ aaj vaqt ne kashkol de diyā

nāzāñ haiñ ham ye soch ke kyā kal rahe haiñ ham

ashkoñ ne aur ātish-e-furqat ko dī havā

barsāt ho rahī hai magar jal rahe haiñ ham

anjān ban ke aaj jo guzrā qarīb se

barsoñ usī ke ishq meñ pāgal rahe haiñ ham

har daur ko lahū kā diyā ham ne hī ḳhirāj

is daur meñ bhī zīnat-e-maqtal rahe haiñ ham

haq-go haiñ haq-shanās haiñ aur haq-parast bhī

'sājid' isī vajah se bahut khal rahe haiñ ham

ai waqt teri aankh ka kajal rahe hain hum

har ek masale ka tere hal rahe hain hum

manzil ki justuju ka ye aalam to dekhiye

sahra hai tez dhup hai aur chal rahe hain hum

hathon mein aaj waqt ne kashkol de diya

nazan hain hum ye soch ke kya kal rahe hain hum

ashkon ne aur aatish-e-furqat ko di hawa

barsat ho rahi hai magar jal rahe hain hum

anjaan ban ke aaj jo guzra qarib se

barson usi ke ishq mein pagal rahe hain hum

har daur ko lahu ka diya hum ne hi KHiraj

is daur mein bhi zinat-e-maqtal rahe hain hum

haq-go hain haq-shanas hain aur haq-parast bhi

'sajid' isi wajah se bahut khal rahe hain hum