ai zauq arz-e-hunar harf-e-etidal mein rakh

ai zauq arz-e-hunar harf-e-e'tidāl meñ rakh

maiñ ik javāb huuñ mujhī ko mire savāl meñ rakh

nuqūsh-e-ḳhāk-e-badan ko tū muntashir kar de

mire vajūd ko phir mere ḳhatt-o-ḳhāl meñ rakh

phir us ke ba.ad hunar dekh mo.jizā.ī ke

tū is badan ko mire dast-e-ittisāl meñ rakh

tū mujh se māñgnā phir mere roz-o-shab kā hisāb

ai haal haal mire mujh ko mere haal meñ rakh

burīda-sar ko sajā de fasīl-e-neza par

darīda jism ko phir arsa-e-qitāl meñ rakh

ye dard terī amānat hai so ise tū sambhāl

ye merā dil hai ise qarya-e-malāl meñ rakh

tujhe ġhurūr hai maiñ bhī balā kā ziddī huuñ

ai merī jaan tū is baat ko ḳhayāl meñ rakh

sunā hai tujh ko bhī hai sher-o-shā.erī se shaġhaf

tū mere sher ko phir 'shāhid' misāl meñ rakh

ai zauq arz-e-hunar harf-e-e'tidal mein rakh

main ek jawab hun mujhi ko mere sawal mein rakh

nuqush-e-KHak-e-badan ko tu muntashir kar de

mere wajud ko phir mere KHatt-o-KHal mein rakh

phir us ke baad hunar dekh mojizai ke

tu is badan ko mere dast-e-ittisal mein rakh

tu mujh se mangna phir mere roz-o-shab ka hisab

ai haal haal mere mujh ko mere haal mein rakh

burida-sar ko saja de fasil-e-neza par

darida jism ko phir arsa-e-qital mein rakh

ye dard teri amanat hai so ise tu sambhaal

ye mera dil hai ise qarya-e-malal mein rakh

tujhe ghurur hai main bhi bala ka ziddi hun

ai meri jaan tu is baat ko KHayal mein rakh

suna hai tujh ko bhi hai sher-o-shaeri se shaghaf

tu mere sher ko phir 'shahid' misal mein rakh