ai zulf-o-ruKH-e-yar teri shoabada-bazi

ai zulf-o-ruḳh-e-yār tirī sho.abada-bāzī

mahmūd sā fāteh bhī hai maftūh-e-ayāzī

le saktā huuñ maiñ apnī duāoñ se vahī kaam

shamshīr se jo kaam liyā karte haiñ ġhāzī

afrād kī hirs-o-havas aqvām pe chhā.ī

ab rang dikhā.egī na.ī zulm-tarāzī

sharminda-e-ma.anī na huā harf-e-mohabbat

bā-īñ-hama tafsīr-e-haqīqī-o-majāzī

man-māne na.e falsafe ghaḌ letā hai aadam

ruuhī kabhī māddī kabhī kashfī kabhī raazī

'dīvāna' kalām aap kā kyā koī sarā hai

gulzār jigar-soḳhtagī-o-qalb-gudāzī

ai zulf-o-ruKH-e-yar teri shoabada-bazi

mahmud sa fateh bhi hai maftuh-e-ayazi

le sakta hun main apni duaon se wahi kaam

shamshir se jo kaam liya karte hain ghazi

afrad ki hirs-o-hawas aqwam pe chhai

ab rang dikhaegi nai zulm-taraazi

sharminda-e-mani na hua harf-e-mohabbat

ba-in-hama tafsir-e-haqiqi-o-majazi

man-mane nae falsafe ghaD leta hai aadam

ruhi kabhi maddi kabhi kashfi kabhi raazi

'diwana' kalam aap ka kya koi sara hai

gulzar jigar-soKHtagi-o-qalb-gudazi