aisa bhi kya hua hai mere ghar ke samne

aisā bhī kyā huā hai mire ghar ke sāmne

har koī aa khaḌā hai mire ghar ke sāmne

ye kaun shaḳhs hai jo dukhoñ se ladhī huī

gaaḌī lagā gayā hai mire ghar ke sāmne

ik to mujhe bhī pīne-pilāne kā shauq hai

us par ye mai-kada hai mire ghar ke sāmne

kyā soch kar maiñ niklūñ Tahalne ba-vaqt-e-shām

jangal bahut ghanā hai mire ghar ke sāmne

mere nasīb meñ hī nahīñ dekhnā use

yuuñ to vo rah rahā hai mire ghar ke sāmne

fursat mile to ek mulāqāt kījiye

mahfūz ik jagah hai mire ghar ke sāmne

ḳhairāt de to dī hai tujhe ai bhikāriyo

ab kis liye rukā hai mire ghar ke sāmne

'jāved' chal ke dekh kahīñ ḳhud tū hī nahīñ

ye jo marā paḌā hai mire ghar ke sāmne

aisa bhi kya hua hai mere ghar ke samne

har koi aa khaDa hai mere ghar ke samne

ye kaun shaKHs hai jo dukhon se ladhi hui

gaDi laga gaya hai mere ghar ke samne

ek to mujhe bhi pine-pilane ka shauq hai

us par ye mai-kada hai mere ghar ke samne

kya soch kar main niklun Tahalne ba-waqt-e-sham

jangal bahut ghana hai mere ghar ke samne

mere nasib mein hi nahin dekhna use

yun to wo rah raha hai mere ghar ke samne

fursat mile to ek mulaqat kijiye

mahfuz ek jagah hai mere ghar ke samne

KHairaat de to di hai tujhe ai bhikariyo

ab kis liye ruka hai mere ghar ke samne

'jawed' chal ke dekh kahin KHud tu hi nahin

ye jo mara paDa hai mere ghar ke samne