aisa bhi nahin dard ne wahshat nahin ki hai

aisā bhī nahīñ dard ne vahshat nahīñ kī hai

is ġham kī kabhī ham ne ishā.at nahīñ kī hai

jab vasl huā us se to sarshār hue haiñ

aur hijr ke mausam ne ri.āyat nahīñ kī hai

jo tū ne diyā us meñ izāfa hī huā hai

is dard kī daulat meñ ḳhayānat nahīñ kī hai

ham ne bhī abhī khol ke rakkhā nahīñ dil ko

tū ne bhī kabhī khul ke vazāhat nahīñ kī hai

is shahr-e-badan ke bhī ajab hote haiñ manzar

lagtā hai abhī tum ne siyāhat nahīñ kī hai

is arz-e-tamannā meñ kise chain milā hai

dil ne magar is ḳhauf se hijrat nahīñ kī hai

ye dil ke ujaḌne kī alāmat na ho koī

milne pe ghaḌī-bhar ko bhī hairat nahīñ kī hai

aisa bhi nahin dard ne wahshat nahin ki hai

is gham ki kabhi hum ne ishaat nahin ki hai

jab wasl hua us se to sarshaar hue hain

aur hijr ke mausam ne riayat nahin ki hai

jo tu ne diya us mein izafa hi hua hai

is dard ki daulat mein KHayanat nahin ki hai

hum ne bhi abhi khol ke rakkha nahin dil ko

tu ne bhi kabhi khul ke wazahat nahin ki hai

is shahr-e-badan ke bhi ajab hote hain manzar

lagta hai abhi tum ne siyahat nahin ki hai

is arz-e-tamanna mein kise chain mila hai

dil ne magar is KHauf se hijrat nahin ki hai

ye dil ke ujaDne ki alamat na ho koi

milne pe ghaDi-bhar ko bhi hairat nahin ki hai