aisa bhi nahin us se mila de koi aa kar

aisā bhī nahīñ us se milā de koī aa kar

kaisā hai vo itnā to batā de koī aa kar

ye bhī to kisī maañ kā dulārā koī hogā

is qabr pe bhī phuul chaḌhā de koī aa kar

sūkhī haiñ baḌī der se palkoñ kī zabāneñ

bas aaj to jī bhar ke rulā de koī aa kar

barsoñ kī duā phir na kahīñ ḳhaak meñ mil jaa.e

ye abr bhī āñdhī na uḌā de koī aa kar

ye koh ye sabza ye machaltī huī nadiyāñ

mar jā.ūñ jo manzil kā patā de koī aa kar

har ghar pe hai āvāz har ik dar pe hai dastak

baiThā huuñ ki mujh ko bhī sadā de koī aa kar

is ḳhvāhish-e-nākām kā ḳhuuñ bhī mire sar hai

zinda huuñ ki is kī bhī sazā de koī aa kar

aisa bhi nahin us se mila de koi aa kar

kaisa hai wo itna to bata de koi aa kar

ye bhi to kisi man ka dulara koi hoga

is qabr pe bhi phul chaDha de koi aa kar

sukhi hain baDi der se palkon ki zabanen

bas aaj to ji bhar ke rula de koi aa kar

barson ki dua phir na kahin KHak mein mil jae

ye abr bhi aandhi na uDa de koi aa kar

ye koh ye sabza ye machalti hui nadiyan

mar jaun jo manzil ka pata de koi aa kar

har ghar pe hai aawaz har ek dar pe hai dastak

baiTha hun ki mujh ko bhi sada de koi aa kar

is KHwahish-e-nakaam ka KHun bhi mere sar hai

zinda hun ki is ki bhi saza de koi aa kar