ایسا بھی تیز نشتر نا مہرباں نہ تھا

ایسا بھی تیز نشتر نا مہرباں نہ تھا

یوں زخم زخم چہرۂ افتادگاں نہ تھا

وہ پیاس تھی کہ حلق سے باہر تھی ہر زباں

اور دور تک کہیں کوئی دریا رواں نہ تھا

دستک پہ اب گھروں سے کوئی بولتا نہیں

پہلے یہ شہر شہر عدم رفتگاں نہ تھا

اب کے تھے کارزار میں سب آشنا حریف

لیکن وہ خوش قتیل کہ شکوہ کناں نہ تھا

خاموش ساعتوں میں تھی روشن تری صدا

ٹھہرا ہوا تھا وقت مگر رائیگاں نہ تھا

باران تیز میں بھی رہے آشیانہ سوز

صحن‌ چمن میں ہم سا کوئی تفتہ جاں نہ تھا