aisa hua hai yar mere imtihan se KHush

aisā huā hai yaar mire imtihāñ se ḳhush

bulbul ho jaise vasl-e-gul-e-bostāñ se ḳhush

gūñgī se kyā hai lutf-e-mulāqāt hazz-e-nafs

vo ḳhud hī jānvar haiñ jo haiñ be-zabāñ se ḳhush

ustād bhī haiñ yaar bhī haiñ bā-mazāq bhī

kyūñkar na dil ho shaiḳh mohammad zamāñ se ḳhush

ai maamā chhed bhed kuchh is meñ zarūr hai

biibī se tū ḳhafā hai magar hai miyāñ se ḳhush

be-uzr haiñ kabhī unheñ inkār hī nahīñ

har baat meñ vo rakhte haiñ āshiq ko haañ se ḳhush

is baat kā hai ham ko 'ināyat' bahut ḳhayāl

nā-ḳhush vo ik zamāne se haiñ kaale ḳhaañ se ḳhush

aisa hua hai yar mere imtihan se KHush

bulbul ho jaise wasl-e-gul-e-bostan se KHush

gungi se kya hai lutf-e-mulaqat hazz-e-nafs

wo KHud hi jaanwar hain jo hain be-zaban se KHush

ustad bhi hain yar bhi hain ba-mazaq bhi

kyunkar na dil ho shaiKH mohammad zaman se KHush

ai mama chhed bhed kuchh is mein zarur hai

bibi se tu KHafa hai magar hai miyan se KHush

be-uzr hain kabhi unhen inkar hi nahin

har baat mein wo rakhte hain aashiq ko han se KHush

is baat ka hai hum ko 'inayat' bahut KHayal

na-KHush wo ek zamane se hain kale KHan se KHush