aisa hunar bhi paya hai usne zindagi se

aisā hunar bhī paayā hai us ne zindagī se

chāñdī nikāl laayā vo shaḳhs shā.erī se

maiñ bhī pighal ke āḳhir ko nuur ban gayā huuñ

itne diye jale haiñ sūraj kī raushnī se

maiñ chāhne kī had se aage nikal gayā thā

phir laash niklī us kī ik roz pālkī se

tasvīr zehn meñ ik sailāb kī basī hai

so saat feet uupar hai ghar mirā sabhī se

dil meñ safar kareñge duniyā meñ āḳhirī tak

vo giit pyaar ke jo gaa.e haiñ bāñsurī se

āvāz gūñjtī in galiyoñ meñ rah ga.ī hai

rishta banā hai merā ye shahr-e-ḳhāmushī se

phir lutf dushmanī meñ aane lagā hai mujh ko

ḳheme badalte dekhe jab dost dostī se

un ko sameT kar vo dariyā meñ le gayā hai

mehnat se maiñ ne joḌe jo jharne sab nadī se

maiñ kah rahā huuñ 'sayyad' manzar rulā.enge ye

jin ko banā rahā hai tū itnī sādgī se

aisa hunar bhi paya hai us ne zindagi se

chandi nikal laya wo shaKHs shaeri se

main bhi pighal ke aaKHir ko nur ban gaya hun

itne diye jale hain suraj ki raushni se

main chahne ki had se aage nikal gaya tha

phir lash nikli us ki ek roz palki se

taswir zehn mein ek sailab ki basi hai

so sat feet upar hai ghar mera sabhi se

dil mein safar karenge duniya mein aaKHiri tak

wo git pyar ke jo gae hain bansuri se

aawaz gunjti in galiyon mein rah gai hai

rishta bana hai mera ye shahr-e-KHamushi se

phir lutf dushmani mein aane laga hai mujh ko

KHeme badalte dekhe jab dost dosti se

un ko sameT kar wo dariya mein le gaya hai

mehnat se main ne joDe jo jharne sab nadi se

main kah raha hun 'sayyad' manzar rulaenge ye

jin ko bana raha hai tu itni sadgi se