aisa mahsus kar raha hun main

aisā mahsūs kar rahā huuñ maiñ

jaise is shahr meñ nayā huuñ maiñ

apnī ḳhushbū se ḳhauf aatā hai

kin havāoñ meñ ghir gayā huuñ maiñ

terī kuchh aur baat hai varna

saath apne bhī kam rahā huuñ maiñ

ḳhāl-o-ḳhad pe na apne ġhaur karo

mujh se rūTho ki aa.ina huuñ maiñ

uf ye kaif-e-fasāna-hā-e-junūñ

likh rahā huuñ miTā rahā huuñ maiñ

koī mausam ho ab mujhe kyā fikr

barg huuñ shāḳh se judā huuñ maiñ

huuñ 'munavvar' burā to maiñ lekin

kaun jaane ki kyuuñ burā huuñ maiñ

aisa mahsus kar raha hun main

jaise is shahr mein naya hun main

apni KHushbu se KHauf aata hai

kin hawaon mein ghir gaya hun main

teri kuchh aur baat hai warna

sath apne bhi kam raha hun main

KHal-o-KHad pe na apne ghaur karo

mujh se ruTho ki aaina hun main

uf ye kaif-e-fasana-ha-e-junun

likh raha hun miTa raha hun main

koi mausam ho ab mujhe kya fikr

barg hun shaKH se juda hun main

hun 'munawwar' bura to main lekin

kaun jaane ki kyun bura hun main