ایسا نہ مجھ کو خواب پریشاں دکھائی دے

ایسا نہ مجھ کو خواب پریشاں دکھائی دے

کشتی ہو جس جگہ وہیں طوفاں دکھائی دے

یوں بے نقاب عارض جاناں دکھائی دے

ہر ذرہ آفتاب بداماں دکھائی دے

وہ مست ناز حسن جہاں جلوہ بار ہو

شام بلا بھی صبح بہاراں دکھائی دے

خوددار ہوں وہ عشق مرا عشق ہی نہیں

جو مبتلائے منت درباں دکھائی دے

اس پارسا کو لا کے ڈبو دے شراب میں

ساقی جو میکدے میں گریزاں دکھائی دے

میرا جنوں نہیں ہے جو موسم کے فیض سے

شرمندۂ بہار گلستاں دکھائی دے

اس کے جنون عشق کا عالم نہ پوچھئے

ہر پھول جس کو عارض جاناں دکھائی دے

شبیرؔ کو یقیں ہے کہ آئے اگر وہ شوخ

کانٹوں کی سرزمیں بھی گلستاں دکھائی دے