aisa nahin ki munh mein hamare zaban nahin

aisā nahīñ ki muñh meñ hamāre zabāñ nahīñ

haiñ kam-suḳhan zarūr pa aajiz bayāñ nahīñ

har-chand jānte haiñ use ham qarīb se

par kyā kareñ ki pā-e-suḳhan darmiyāñ nahīñ

achchhā to ek pal ke liye hī uThā ke dekh

ai āsmāñ jo bār-e-amānat-garāñ nahīñ

ḳhud ham meñ tāb-e-dīd nahīñ hai ye aur baat

rahtā hai vo nigāh ke aage kahāñ nahīñ

'farruḳh' kahīñ na sun ke kare vo bhī an-sunī

kahte haiñ us se is liye dard-e-nihāñ nahīñ

aisa nahin ki munh mein hamare zaban nahin

hain kam-suKHan zarur pa aajiz bayan nahin

har-chand jaante hain use hum qarib se

par kya karen ki pa-e-suKHan darmiyan nahin

achchha to ek pal ke liye hi uTha ke dekh

ai aasman jo bar-e-amanat-garan nahin

KHud hum mein tab-e-did nahin hai ye aur baat

rahta hai wo nigah ke aage kahan nahin

'farruKH' kahin na sun ke kare wo bhi an-suni

kahte hain us se is liye dard-e-nihan nahin