aisa nahin ki un se mohabbat nahin mujhe

aisā nahīñ ki un se mohabbat nahīñ mujhe

ifshā-e-rāz-e-ishq kī jur.at nahīñ mujhe

jalve haiñ un ke nau-ba-nau merī nigāh meñ

ab un ko ġham ye hai ġham-e-furqat nahīñ mujhe

rakhnā hai un ke paañv pe jā kar sar-e-niyāz

ruk jā ajal kyā itnī bhī mohlat nahīñ mujhe

shorīdgī-e-ishq kahāñ le ke aa ga.ī

phūloñ se bhī jahāñ koī raġhbat nahīñ mujhe

hotī hai un se pahroñ tasavvur meñ guftugū

sochūñ kuchh aur itnī bhī fursat nahīñ mujhe

rusvā jahāñ meñ kar diyā us jazb-e-shauq ne

maqsūd varna ishq meñ shohrat nahīñ mujhe

is darja jhuuT suntā rahā huuñ tamām umr

sunñe kī sach bhī ab koī aadat nahīñ mujhe

ab un se hāl-e-dil maiñ bayāñ 'soz' kyā karūñ

apnī zabān par bhī to qudrat nahīñ mujhe

aisa nahin ki un se mohabbat nahin mujhe

ifsha-e-raaz-e-ishq ki jurat nahin mujhe

jalwe hain un ke nau-ba-nau meri nigah mein

ab un ko gham ye hai gham-e-furqat nahin mujhe

rakhna hai un ke panw pe ja kar sar-e-niyaz

ruk ja ajal kya itni bhi mohlat nahin mujhe

shoridgi-e-ishq kahan le ke aa gai

phulon se bhi jahan koi raghbat nahin mujhe

hoti hai un se pahron tasawwur mein guftugu

sochun kuchh aur itni bhi fursat nahin mujhe

ruswa jahan mein kar diya us jazb-e-shauq ne

maqsud warna ishq mein shohrat nahin mujhe

is darja jhuT sunta raha hun tamam umr

sunne ki sach bhi ab koi aadat nahin mujhe

ab un se haal-e-dil main bayan 'soz' kya karun

apni zaban par bhi to qudrat nahin mujhe