ایسا نہیں ملے گا کہیں بے قرار دل

ایسا نہیں ملے گا کہیں بے قرار دل

آشفتگی کا مارا ہوا سوگوار دل

بازار بھی ہے دیر و حرم بھی ہیں عشق بھی

جھیلے تو جھیلے کتنا غم روزگار دل

کچھ روز سے وہ خستہ تنی ہے کہ کیا کہوں

سینہ رفو کیا تو ہوا تار تار دل

تھا اک خیال اس کا سو وہ بھی چلا گیا

کس سے نکالے جا کے بھلا اب غبار دل

بس ایک سنگ در سے رہا رشتہ عمر بھر

ایسا نہیں ملے گا عبادت گزار دل

تیری ہی بے نیاز ادا کا اثر یہ ہے

اب خود ہی ڈھونڈھنے لگا راہ فرار دل

اس شہر رنگ و نور سے آگے نکل گیا

اب جا چکا ہے عشق مجازی کے پار دل