aisa nahin milega kahin be-qarar dil

aisā nahīñ milegā kahīñ be-qarār dil

āshuftagī kā maarā huā sogvār dil

bāzār bhī hai dair-o-haram bhī haiñ ishq bhī

jhele to jhele kitnā ġham-e-rozgār dil

kuchh roz se vo ḳhasta-tanī hai ki kyā kahūñ

siina rafū kiyā to huā tār-tār dil

thā ik ḳhayāl us kā so vo bhī chalā gayā

kis se nikāle jā ke bhalā ab ġhubār-e-dil

bas ek sang-e-dar se rahā rishta umr-bhar

aisā nahīñ milegā ibādat-guzār dil

terī hī be-niyāz adā kā asar ye hai

ab ḳhud hī DhūñDhne lagā rāh-e-farār dil

is shahr-e-rang-o-nūr se aage nikal gayā

ab jā chukā hai ishq-e-majāzī ke paar dil

aisa nahin milega kahin be-qarar dil

aashuftagi ka mara hua sogwar dil

bazar bhi hai dair-o-haram bhi hain ishq bhi

jhele to jhele kitna gham-e-rozgar dil

kuchh roz se wo KHasta-tani hai ki kya kahun

sina rafu kiya to hua tar-tar dil

tha ek KHayal us ka so wo bhi chala gaya

kis se nikale ja ke bhala ab ghubar-e-dil

bas ek sang-e-dar se raha rishta umr-bhar

aisa nahin milega ibaadat-guzar dil

teri hi be-niyaz ada ka asar ye hai

ab KHud hi DhunDhne laga rah-e-farar dil

is shahr-e-rang-o-nur se aage nikal gaya

ab ja chuka hai ishq-e-majazi ke par dil