aisa nahin tha asl mein jaisa bana liya

aisā nahīñ thā asl meñ jaisā banā liyā

dil ne kisī kī yaad kā chehra banā liyā

pahlī nashist ābla-pāoñ meñ merī hai

majnūñ ko maiñ ne dasht meñ chelā banā liyā

khīñchī hai apne ḳhuun se naqshe pe ik lakīr

jangal meñ apnī marzī kā rasta banā liyā

mere liye to in meñ koī farq hai nahīñ

jab chāhā apnī beTī ko beTā banā liyā

mahrūm yuuñ huī huuñ maiñ us dar ke sāmne

makḌī ne mere hoñToñ pe jaalā banā liyā

un meñ kashish ajiib thī dariyā-dilī ke saath

logoñ ne dasht-zādoñ ko aaqā banā liyā

chamkā thā ek jugnū mire dil ke ās-pās

ab jis ko sab ne aañkh kā taara banā liyā

ghar meñ jagah hai us kī na hai ghaaT meñ jagah

qismat ko ham ne dhobī kā kuttā banā liyā

ham ne vahāñ faroḳht kī thī vahshateñ 'sabā'

duniyā ne jis dukān meñ khātā banā liyā

aisa nahin tha asl mein jaisa bana liya

dil ne kisi ki yaad ka chehra bana liya

pahli nashist aabla-paon mein meri hai

majnun ko main ne dasht mein chela bana liya

khinchi hai apne KHun se naqshe pe ek lakir

jangal mein apni marzi ka rasta bana liya

mere liye to in mein koi farq hai nahin

jab chaha apni beTi ko beTa bana liya

mahrum yun hui hun main us dar ke samne

makDi ne mere honTon pe jala bana liya

un mein kashish ajib thi dariya-dili ke sath

logon ne dasht-zadon ko aaqa bana liya

chamka tha ek jugnu mere dil ke aas-pas

ab jis ko sab ne aankh ka tara bana liya

ghar mein jagah hai us ki na hai ghaT mein jagah

qismat ko hum ne dhobi ka kutta bana liya

hum ne wahan faroKHt ki thi wahshaten 'saba'

duniya ne jis dukan mein khata bana liya