ایسے بھی کہاں ملیں گے دل جو

ایسے بھی کہاں ملیں گے دل جو

اعجاز برنگ چشم آہو

اک بار ہم اس طرح سے روئے

ان کے بھی نکل پڑے تھے آنسو

پھرتا ہوں میں در بدر جہاں میں

کس کی ہے تلاش آج ہر سو

اپنی سی جہاں میں کر گزریے

شل ہوتے رہیں گے دست و بازو

دیوانہ بنا رہے ہیں ہم کو

دنیا یہ ترے دراز گیسو

ایمان ہے جن کا رنگ و بو پر

ٹھہرے ہیں وہی تو آج بد خو

ٹوٹا ہے طلسم پاک بازی

آنکھوں میں وہ بھر کے آئے جادو

بدلا نہیں رنگ گلستاں کا

پھولوں میں کہاں سے آئے خوشبو

انجمؔ یہ مرض نہ جائے گا اب

اب اس کی کوئی دوا نہ دارو