aise bhi KHafa kya ki sitam hi na jafa hi

aise bhī ḳhafā kyā ki sitam hī na jafā hī

ye tark-e-ta'alluq hai ki begāna-nigāhī

vo jin ko mire dard ke darmāñ kī nahīñ fikr

kyoñ shaaq guzartī hai unheñ merī tabāhī

maiñ haath uThā.e hue kyā maañg rahā huuñ

dil meñ koī hasrat hī na hoñToñ pe du'ā hī

ab apnī vafā kā bhī yaqīñ mujh ko nahīñ hai

ye kaun sī manzil hai mohabbat kī ilāhī

ai rah-rav-e-ḳhush-fahm bahar-gām ye sajde

kyā terā muqaddar haiñ ye naqsh-e-kaf-e-pā hī

ham karte rahe jitnī ujāloñ kī du'ā.eñ

baḌhtī hī ga.ī aur muqaddar kī siyāhī

jis raah pe huuñ garm-e-safar aaj maiñ 'afzal'

us raah se guzregā koī ābla-pā hī

aise bhi KHafa kya ki sitam hi na jafa hi

ye tark-e-ta'alluq hai ki begana-nigahi

wo jin ko mere dard ke darman ki nahin fikr

kyon shaq guzarti hai unhen meri tabahi

main hath uThae hue kya mang raha hun

dil mein koi hasrat hi na honTon pe du'a hi

ab apni wafa ka bhi yaqin mujh ko nahin hai

ye kaun si manzil hai mohabbat ki ilahi

ai rah-raw-e-KHush-fahm bahar-gam ye sajde

kya tera muqaddar hain ye naqsh-e-kaf-e-pa hi

hum karte rahe jitni ujalon ki du'aen

baDhti hi gai aur muqaddar ki siyahi

jis rah pe hun garm-e-safar aaj main 'afzal'

us rah se guzrega koi aabla-pa hi