aise Dare hain kis ki nigah-e-ghazab se hum

aise Dare haiñ kis kī nigāh-e-ġhazab se ham

bad-ḳhvāb ho ga.e haiñ jo do chaar shab se ham

kab kāmyāb-e-bosa hue us ke lab se ham

sharminda hī rahe dil-e-matlab-matlab se ham

bosa na le sake kaf-e-pā kā adab se ham

kāTeñ haiñ is liye kaf-e-afsos shab se ham

saudā-gar-e-safā-e-dil-e-be-ġhubār haiñ

ajnās-e-shīsha laa.e haiñ shahr-e-halab se ham

ye roz DhūñDh laa.e hai ik ḳhūb-rū nayā

shākī haiñ apne hī dil-e-āfat-talab se ham

kashtī hamārī bahr kī hai māñjdhār meñ

nikle haiñ kab kashākash-e-lutf-o-ġhazab se ham

tarz-e-ḳhirām-e-nāz kī be-etidāliyāñ

dekheñ haiñ aur kuchh nahīñ kahte adab se ham

burqe meñ ho ki parda-e-chādar meñ ḳhūb-rū

pahchānte haiñ vaz.a se shoḳhī se chhab se ham

shaġhl-e-sharāb o shīsha o sāqī-e-naġhma-sanj

taa.ib hue haiñ ālam-e-pīrī meñ sab se ham

be-lutf zindagī ke haiñ din aa bhī ai ajal

tere hī intizār meñ baiThe haiñ kab se ham

fan itnā kam kyā hai ki in rozoñ 'mus.hafī'

dil meñ ik uns rakhte haiñ sher-e-arab se ham

aise Dare hain kis ki nigah-e-ghazab se hum

bad-KHwab ho gae hain jo do chaar shab se hum

kab kaamyab-e-bosa hue us ke lab se hum

sharminda hi rahe dil-e-matlab-matlab se hum

bosa na le sake kaf-e-pa ka adab se hum

kaTen hain is liye kaf-e-afsos shab se hum

sauda-gar-e-safa-e-dil-e-be-ghubar hain

ajnas-e-shisha lae hain shahr-e-halab se hum

ye roz DhunDh lae hai ek KHub-ru naya

shaki hain apne hi dil-e-afat-talab se hum

kashti hamari bahr ki hai manjdhaar mein

nikle hain kab kashakash-e-lutf-o-ghazab se hum

tarz-e-KHiram-e-naz ki be-etidaliyan

dekhen hain aur kuchh nahin kahte adab se hum

burqe mein ho ki parda-e-chadar mein KHub-ru

pahchante hain waza se shoKHi se chhab se hum

shaghl-e-sharab o shisha o saqi-e-naghma-sanj

taib hue hain aalam-e-piri mein sab se hum

be-lutf zindagi ke hain din aa bhi ai ajal

tere hi intizar mein baiThe hain kab se hum

fan itna kam kya hai ki in rozon 'mushafi'

dil mein ek uns rakhte hain sher-e-arab se hum