aise dekha hai ki dekha hi na ho

aise dekhā hai ki dekhā hī na ho

jaise mujh ko tirī parvā hī na ho

ba.az ghar shahr meñ aise dekhe

jaise un meñ koī rahtā hī na ho

mujh se katrā ke bhalā kyuuñ jaatā

shāyad us ne mujhe dekhā hī na ho

ye samajhtā hai har aane vaalā

maiñ na aa.uuñ to tamāshā hī na ho

yuuñ bhaTakne pe huuñ qaane jaise

rāstoñ meñ koī dariyā hī na ho

raat har chaap pe aatā thā ḳhayāl

uTh ke dekhūñ koī aayā hī na ho

kaise chhoḌūñ dar-o-dīvār apne

kyā ḳhabar lauT ke aanā hī na ho

haiñ sabhī ġhair to apnā maskan

shahr kyuuñ ho koī sahrā hī na ho

yuuñ to kahne ko bahut kuchh hai 'shu.ūr'

kyā kahūñ jab koī suntā hī na ho

aise dekha hai ki dekha hi na ho

jaise mujh ko teri parwa hi na ho

baz ghar shahr mein aise dekhe

jaise un mein koi rahta hi na ho

mujh se katra ke bhala kyun jata

shayad us ne mujhe dekha hi na ho

ye samajhta hai har aane wala

main na aaun to tamasha hi na ho

yun bhaTakne pe hun qane jaise

raston mein koi dariya hi na ho

raat har chap pe aata tha KHayal

uTh ke dekhun koi aaya hi na ho

kaise chhoDun dar-o-diwar apne

kya KHabar lauT ke aana hi na ho

hain sabhi ghair to apna maskan

shahr kyun ho koi sahra hi na ho

yun to kahne ko bahut kuchh hai 'shuur'

kya kahun jab koi sunta hi na ho