aise ghar mein rah raha hun dekh le be-shak koi

aise ghar meñ rah rahā huuñ dekh le be-shak koī

jis ke darvāze kī qismat meñ nahīñ dastak koī

yuuñ to hone ko sabhī kuchh hai mire dil meñ magar

is dukāñ par aaj tak aayā nahīñ gāhak koī

vo ḳhudā kī khoj meñ ḳhud āḳhirī had tak gayā

ḳhud ko paane kī magar koshish na kī anthak koī

baaġh meñ kal raat phūloñ kī havelī luT ga.ī

chashm-e-shabnam se churā kar le gayā ThanDak koī

de gayā āñkhoñ ko farsh-e-rāh banñe kā sila

de gayā bīnā.ī ko sauġhāt meñ dīmak koī

ek bhī ḳhvāhish ke hāthoñ meñ na mehñdī lag sakī

mere jazboñ meñ na dūlhā ban sakā ab tak koī

vo bhī 'sājid' thā mire jazboñ kī chorī meñ sharīk

us kī jānib kyuuñ nahīñ uTThī nigāh-e-shak koī

aise ghar mein rah raha hun dekh le be-shak koi

jis ke darwaze ki qismat mein nahin dastak koi

yun to hone ko sabhi kuchh hai mere dil mein magar

is dukan par aaj tak aaya nahin gahak koi

wo KHuda ki khoj mein KHud aaKHiri had tak gaya

KHud ko pane ki magar koshish na ki anthak koi

bagh mein kal raat phulon ki haweli luT gai

chashm-e-shabnam se chura kar le gaya ThanDak koi

de gaya aankhon ko farsh-e-rah banne ka sila

de gaya binai ko saughat mein dimak koi

ek bhi KHwahish ke hathon mein na mehndi lag saki

mere jazbon mein na dulha ban saka ab tak koi

wo bhi 'sajid' tha mere jazbon ki chori mein sharik

us ki jaanib kyun nahin uTThi nigah-e-shak koi