ایسے میں زخم دل کی بھلا کیا دوا ملے

ایسے میں زخم دل کی بھلا کیا دوا ملے

جتنے مسیح تھے سبھی قاتل سے جا ملے

وہ وقت ہے کہ غم کا چھپانا بھی ہے محال

آنسو جو پونچھتا ہوں تو دامن جلا ملے

یہ شہر زندگی ہے میں کیسے یقیں کروں

آخر کہیں چراغ تو جلتا ہوا ملے

کب تک یوں ہی بھٹکتے پھریں رہروان زیست

دروازہ زندگی کا کہیں تو کھلا ملے

کشتی مری شکستہ سہی کیسے چھوڑ دوں

طوفاں میں ناخدا بھی جہاں ڈوبتا ملے

مذہب کے تاجروں کا اب عالم نہ پوچھئے

یہ بیچ دیں خدا کو کہیں گر خدا ملے