aise mein zaKHm-e-dil ki bhala kya dawa mile

aise meñ zaḳhm-e-dil kī bhalā kyā davā mile

jitne masīh the sabhī qātil se jā mile

vo vaqt hai ki ġham kā chhupānā bhī hai muhāl

aañsū jo poñchhtā huuñ to dāman jalā mile

ye shahr-e-zindagī hai maiñ kaise yaqīñ karūñ

āḳhir kahīñ charāġh to jaltā huā mile

kab tak yūñhī bhaTakte phireñ rahravān-e-zīst

darvāza zindagī kā kahīñ to khulā mile

kashtī mirī shikasta sahī kaise chhoḌ duuñ

tūfāñ meñ nāḳhudā bhī jahāñ Dūbtā mile

maz.hab ke tājiroñ kā ab aalam na pūchhiye

ye bech deñ ḳhudā ko kahīñ gar ḳhudā mile

aise mein zaKHm-e-dil ki bhala kya dawa mile

jitne masih the sabhi qatil se ja mile

wo waqt hai ki gham ka chhupana bhi hai muhaal

aansu jo ponchhta hun to daman jala mile

ye shahr-e-zindagi hai main kaise yaqin karun

aaKHir kahin charagh to jalta hua mile

kab tak yunhi bhaTakte phiren rahrawan-e-zist

darwaza zindagi ka kahin to khula mile

kashti meri shikasta sahi kaise chhoD dun

tufan mein naKHuda bhi jahan Dubta mile

mazhab ke tajiron ka ab aalam na puchhiye

ye bech den KHuda ko kahin gar KHuda mile