aise roya ki dil-e-zar ne sone na diya

aise royā ki dil-e-zār ne sone na diyā

raat bhar dard kī takrār ne sone na diyā

tum jo aa.e to kahāñ niiñd kahāñ kā ārām

kaif-o-mastī bhare isrār ne sone na diyā

hijr kī aag ne din-rāt jalāyā ham ko

roz-o-shab dīda-e-bedār ne sone na diyā

zaḳhm ro.e kabhī āñkheñ to kabhī dil taḌpā

ek lamha inhīñ do-chār ne sone na diyā

us kī yādoñ kā har ik naqsh bulātā thā mujhe

mujh ko shab bhar dar-o-dīvār ne sone na diyā

vasl kī raat ajab rang meñ guzrī 'zākir'

yaar ko maiñ ne mujhe yaar ne sone na diyā

aise roya ki dil-e-zar ne sone na diya

raat bhar dard ki takrar ne sone na diya

tum jo aae to kahan nind kahan ka aaram

kaif-o-masti bhare israr ne sone na diya

hijr ki aag ne din-raat jalaya hum ko

roz-o-shab dida-e-bedar ne sone na diya

zaKHm roe kabhi aankhen to kabhi dil taDpa

ek lamha inhin do-chaar ne sone na diya

us ki yaadon ka har ek naqsh bulata tha mujhe

mujh ko shab bhar dar-o-diwar ne sone na diya

wasl ki raat ajab rang mein guzri 'zakir'

yar ko main ne mujhe yar ne sone na diya