aish-e-hāzir bhī kahāñ ġham se rihā.ī degā
lazzat-e-qurb meñ ehsās-e-judā.ī degā
ek hī aks har ik aks pe hogā haavī
laakh chehroñ meñ vahī shaḳhs dikhā.ī degā
uf ye iḳhlās tirā uf ye tirā tarz-e-tapāk
tū mujhe kaun sā dukh ai mire bhaa.ī degā
haa.e vo ġham ki milegā mujhe shahnā.ī se
haa.e vo dukh jo tirā dast-e-hinā.ī degā
mire ehsās se zāhir hai sadāqat merī
maiñ jo chāhūñgā vahī rang dikhā.ī degā
sar-phirā laakh sahī phir bhī 'munavvar' kab tak
barf-e-ehsās ko tū shola-qabā.ī degā
aish-e-hazir bhi kahan gham se rihai dega
lazzat-e-qurb mein ehsas-e-judai dega
ek hi aks har ek aks pe hoga hawi
lakh chehron mein wahi shaKHs dikhai dega
uf ye iKHlas tera uf ye tera tarz-e-tapak
tu mujhe kaun sa dukh ai mere bhai dega
hae wo gham ki milega mujhe shahnai se
hae wo dukh jo tera dast-e-hinai dega
mere ehsas se zahir hai sadaqat meri
main jo chahunga wahi rang dikhai dega
sar-phira lakh sahi phir bhi 'munawwar' kab tak
barf-e-ehsas ko tu shola-qabai dega
Additional information available
Click on the INTERESTING button to view additional information associated with this sher.
rare Unpublished content
This ghazal contains ashaar not published in the public domain. These are marked by a red line on the left.