عیش جس گھر میں میسر تھا وہ گھر یاد نہیں

عیش جس گھر میں میسر تھا وہ گھر یاد نہیں

اب تو ویرانے میں سنتا کوئی فریاد نہیں

کون ہے وہ جو ترے عشق میں برباد نہیں

کون فرقت میں تری مائل فریاد نہیں

حسن بے مثل تھا بے مثل تھی ہر شان جمال

انہیں سو مرتبہ دیکھا ہے مگر یاد نہیں

دار فانی تجھے دیتا ہے فریب تعمیر

ہے یہ ویران سرا کوئی گھر آباد نہیں

تو جسے چاہے اسے ہوگا دو عالم میں عروج

تو جسے چاہے وہ کونین میں برباد نہیں

عیش بچپن کا رکھوں یاد میں کیوں پیری میں

جب جوانی کا مجھے لطف عمرؔ یاد نہیں