aisi bhi kya jaldi pyare jaane milen phir ya na milen hum

aisī bhī kyā jaldī pyāre jaane mileñ phir yā na mileñ ham

kaun kahegā phir ye fasāna baiTh bhī jaao sun lo koī dam

vasl kī shīrīnī meñ pinhāñ hijr kī talḳhī bhī hai kam kam

tum se milne kī bhī ḳhushī hai tum se judā hone kā bhī ġham

husn-o-ishq judā hote haiñ jaane kyā tūfān uThegā

husn kī āñkheñ bhī haiñ pur-nam 'ishq kī āñkheñ bhī haiñ pur-nam

merī vafā to nādānī thī tum ne magar ye kyā Thānī thī

kaash na karte mujh se mohabbat kaash na hotā dil kā ye 'ālam

parvāne kī ḳhaak pareshāñ sham' kī lau bhī larzāñ larzāñ

mahfil kī mahfil hai vīrāñ kaun kare ab kis kā mātam

kuchh bhī ho par in āñkhoñ ne aksar ye 'ālam bhī dekhā

'ishq kī duniyā nāz-e-sarāpā husn kī duniyā ijz-e-mujassam

shahd-shikan hoñToñ kī larzish 'ishrat baaqī kā gahvāra

dā.era-e-imkān-e-tamannā narm lachaktī bāñhoñ ke ḳham

apne apne dil ke hāthoñ donoñ hī barbād hue haiñ

maiñ huuñ aur vafā kā ronā vo haiñ aur jafā kā mātam

nākāmī sī nākāmī hai mahrūmī sī mahrūmī hai

dil kā manānā sa.ī-e-musalsal un ko bhulānā koshish-e-paiham

ahd-e-vafā hai aur bhī mohkam terī judā.ī ke maiñ qurbāñ

terī judā.ī ke maiñ qurbāñ ahd-e-vafā hai aur bhī mohkam

aisi bhi kya jaldi pyare jaane milen phir ya na milen hum

kaun kahega phir ye fasana baiTh bhi jao sun lo koi dam

wasl ki shirini mein pinhan hijr ki talKHi bhi hai kam kam

tum se milne ki bhi KHushi hai tum se juda hone ka bhi gham

husn-o-ishq juda hote hain jaane kya tufan uThega

husn ki aankhen bhi hain pur-nam 'ishq ki aankhen bhi hain pur-nam

meri wafa to nadani thi tum ne magar ye kya Thani thi

kash na karte mujh se mohabbat kash na hota dil ka ye 'alam

parwane ki KHak pareshan sham' ki lau bhi larzan larzan

mahfil ki mahfil hai viran kaun kare ab kis ka matam

kuchh bhi ho par in aankhon ne aksar ye 'alam bhi dekha

'ishq ki duniya naz-e-sarapa husn ki duniya ijz-e-mujassam

shahd-shikan honTon ki larzish 'ishrat baqi ka gahwara

daera-e-imkan-e-tamanna narm lachakti banhon ke KHam

apne apne dil ke hathon donon hi barbaad hue hain

main hun aur wafa ka rona wo hain aur jafa ka matam

nakaami si nakaami hai mahrumi si mahrumi hai

dil ka manana sai-e-musalsal un ko bhulana koshish-e-paiham

ahd-e-wafa hai aur bhi mohkam teri judai ke main qurban

teri judai ke main qurban ahd-e-wafa hai aur bhi mohkam