aisi hoti hain baz taqdiren

aisī hotī haiñ ba.az taqdīreñ

bahte paanī pe jaise tahrīreñ

ret ke ik gharauñde jaisī haiñ

aadmī kī jahāñ meñ tadbīreñ

ham ne to sirf ḳhvāb dekhe the

bas meñ apne kahāñ thiiñ tā'bīreñ

qasr-e-zar meñ sajī huiiñ dekhīñ

muflisoñ be-gharoñ kī tasvīreñ

merī qismat meñ zulmateñ saarī

us kī muTThī meñ saarī tanvīreñ

jī meñ aatā hai toḌ hī Dālūñ

saarī hosh-o-ḳhirad kī zanjīreñ

yaad ke taar taar canvas par

ab bhī baaqī haiñ chand tasvīreñ

baat 'sajjād' saaf kahtā hai

aap jo chāheñ kar leñ tafsīreñ

aisi hoti hain baz taqdiren

bahte pani pe jaise tahriren

ret ke ek gharaunde jaisi hain

aadmi ki jahan mein tadbiren

hum ne to sirf KHwab dekhe the

bas mein apne kahan thin ta'biren

qasr-e-zar mein saji huin dekhin

muflison be-gharon ki taswiren

meri qismat mein zulmaten sari

us ki muTThi mein sari tanwiren

ji mein aata hai toD hi Dalun

sari hosh-o-KHirad ki zanjiren

yaad ke tar tar canwas par

ab bhi baqi hain chand taswiren

baat 'sajjad' saf kahta hai

aap jo chahen kar len tafsiren