ایسی کرخت دھوپ تھی چہرے اجڑ گئے

ایسی کرخت دھوپ تھی چہرے اجڑ گئے

کچھ لوگ اپنے جسم کے اندر سکڑ گئے

سورج نے بڑھ کے تھام لیا ہے نظر کا ہاتھ

جب بھی نظر کے پاؤں زمیں سے اکھڑ گئے

لفظوں کی توپ سوچ کے ہتھیار تھام کر

آپس میں خود ہی فن کے نگہبان لڑ گئے

جب سے پہن لیا ہے غموں نے نیا لباس

ملبوس چاہتوں کے بہت میلے پڑ گئے

میرے بدن میں زہر تبسم کا گھول کر

وہ کون تھے جو مجھ سے اچانک بچھڑ گئے

سچائی کے لبوں پہ رکھے اس نے لب مگر

کچھ لوگ بے سبب ہی صباؔ سے بگڑ گئے