aisi koi darpesh hawa aai hamare

aisī koī darpesh havā aa.ī hamāre

jo saath hī patte bhī uḌā laa.ī hamāre

vo abr ki chhāyā rahā āñkhoñ ke ufuq par

vo barq jo andar kahīñ lahrā.ī hamāre

dekhā hai bahut ḳhvāb-e-mulāqāt bhī har-ros

hisse meñ jo ab aa.ī hai tanhā.ī hamāre

is baar milī hai jo natīje meñ burā.ī

kaam aa.ī hai apnī koī achchhā.ī hamāre

the hī nahīñ maujūd to kyuuñ ḳhalq ne us kī

chāroñ taraf afvāh sī phailā.ī hamāre

phir jhuuT kī is meñ hameñ karnī hai milāvaT

phir raas nahīñ aa.egī sachchā.ī hamāre

Darte hue kholā to hai ye bāb-e-ta.āruf

paḌ jaa.e gale hī na shanāsā.ī hamāre

daavā to bahut ramz-shanāsī kā use thā

ye ḳhalq ishāre na samajh paa.ī hamāre

chal bhī diye dikhlā ke tamāshā to 'zafar' ham

baiThe rahe tā-der tamāshā.ī hamāre

aisi koi darpesh hawa aai hamare

jo sath hi patte bhi uDa lai hamare

wo abr ki chhaya raha aankhon ke ufuq par

wo barq jo andar kahin lahrai hamare

dekha hai bahut KHwab-e-mulaqat bhi har-ros

hisse mein jo ab aai hai tanhai hamare

is bar mili hai jo natije mein burai

kaam aai hai apni koi achchhai hamare

the hi nahin maujud to kyun KHalq ne us ki

chaaron taraf afwah si phailai hamare

phir jhuT ki is mein hamein karni hai milawaT

phir ras nahin aaegi sachchai hamare

Darte hue khola to hai ye bab-e-taaruf

paD jae gale hi na shanasai hamare

dawa to bahut ramz-shanasi ka use tha

ye KHalq ishaare na samajh pai hamare

chal bhi diye dikhla ke tamasha to 'zafar' hum

baiThe rahe ta-der tamashai hamare