aisi tahrir jo aansu ki jhaDi sabit ho

aisī tahrīr jo aañsū kī jhaḌī sābit ho

phir tavaqqo.a ki mohabbat bhī kaḌī sābit ho

kyoñ bichhāte ho mirī raah meñ lafzī kāñTe

do vo paiġhām jo motī kī laḌī sābit ho

terī shamshīr kā shāḳh-e-gul-e-ulfat pe ho vaar

kaise mumkin ki vo phūloñ kī chhaḌī sābit ho

be-niyāzī tirī baḌhtī hī rahī roz-o-shab

terī furqat meñ koī achchhī ghaḌī sābit ho

maut aanī hai to aa jaa.e kisī din lekin

zindagī bhī kabhī rāhoñ meñ paḌī sābit ho

kaash aa jaa.e yaqīñ merī mohabbat kā tujhe

merī chāhat tirī har shai se baḌī sābit ho

ruuTh kar jab maiñ chalūñ rāh-e-adam kī jānib

raah roke tirī āvāz khaḌī sābit ho

dil meñ chāhat hai 'ġhazal' sirf tujhe paane kī

koī to vasl kī anmol ghaḌī sābit ho

aisi tahrir jo aansu ki jhaDi sabit ho

phir tawaqqoa ki mohabbat bhi kaDi sabit ho

kyon bichhate ho meri rah mein lafzi kanTe

do wo paigham jo moti ki laDi sabit ho

teri shamshir ka shaKH-e-gul-e-ulfat pe ho war

kaise mumkin ki wo phulon ki chhaDi sabit ho

be-niyazi teri baDhti hi rahi roz-o-shab

teri furqat mein koi achchhi ghaDi sabit ho

maut aani hai to aa jae kisi din lekin

zindagi bhi kabhi rahon mein paDi sabit ho

kash aa jae yaqin meri mohabbat ka tujhe

meri chahat teri har shai se baDi sabit ho

ruTh kar jab main chalun rah-e-adam ki jaanib

rah roke teri aawaz khaDi sabit ho

dil mein chahat hai 'ghazal' sirf tujhe pane ki

koi to wasl ki anmol ghaDi sabit ho