aisi tanhai hai apne se bhi ghabraata hun main

aisī tanhā.ī hai apne se bhī ghabrātā huuñ maiñ

jal rahī haiñ yaad kī sham.eñ bujhā jaatā huuñ maiñ

aa ga.ī āḳhir ġham-e-dil vo bhī manzil aa ga.ī

mujh ko samjhāte the jo ab un ko samjhātā huuñ maiñ

zindagī āzāda-rau bahr-e-haqīqat be-kanār

mauj aatī hai to baḌhtā hī chalā jaatā huuñ maiñ

bazm-e-fikr-o-hosh ho yā mahfil-e-aish-o-nishāt

har jagah se chand nashtar chand ġham laatā huuñ maiñ

zehn meñ yādoñ ke gulshan dil meñ azm-e-jū-e-shīr

ik nayā farhād paatā huuñ jidhar jaatā huuñ maiñ

shab ke sannāTe meñ rah ġhairoñ ke naġhme kī tarah

ahl-e-dil kī bastiyoñ meñ aah ban jaatā huuñ maiñ

himmat-afzā hai har ik uftād rāh-e-ishq kī

Thokareñ khātā huuñ girtā huuñ sambhal jaatā huuñ maiñ

ishq aksar māñgtā hai naġhma-e-ishrat kī bhiik

ahl-e-duniyā kī tahī-dastī pe sharmātā huuñ maiñ

shām-e-tanhā.ī bujhā do jhilmilātī sham.a bhī

in añdheroñ hī meñ aksar raushnī paatā huuñ maiñ

aaj āġhosh-e-tamannā thī shanāsā-e-visāl

razm-gāh-e-zindagī meñ tāza-dam aatā huuñ maiñ

koī nāzuk haath baazū thaam letā hai mirā

Thokareñ khātā to huuñ lekin sambhal jaatā huuñ maiñ

apne miTne kā bhī ġham hotā hai is ehsās se

maiñ nahīñ apnā magar terā to kahlātā huuñ maiñ

hai suhānī kis qadar un dūriyoñ kī chāñdnī

pūchh letā hai koī 'zaidī' to itrātā huuñ maiñ

aisi tanhai hai apne se bhi ghabraata hun main

jal rahi hain yaad ki shamen bujha jata hun main

aa gai aaKHir gham-e-dil wo bhi manzil aa gai

mujh ko samjhate the jo ab un ko samjhata hun main

zindagi aazada-rau bahr-e-haqiqat be-kanar

mauj aati hai to baDhta hi chala jata hun main

bazm-e-fikr-o-hosh ho ya mahfil-e-aish-o-nishat

har jagah se chand nashtar chand gham lata hun main

zehn mein yaadon ke gulshan dil mein azm-e-ju-e-shir

ek naya farhad pata hun jidhar jata hun main

shab ke sannaTe mein rah ghairon ke naghme ki tarah

ahl-e-dil ki bastiyon mein aah ban jata hun main

himmat-afza hai har ek uftad rah-e-ishq ki

Thokaren khata hun girta hun sambhal jata hun main

ishq aksar mangta hai naghma-e-ishrat ki bhik

ahl-e-duniya ki tahi-dasti pe sharmata hun main

sham-e-tanhai bujha do jhilmilati shama bhi

in andheron hi mein aksar raushni pata hun main

aaj aaghosh-e-tamanna thi shanasa-e-visal

razm-gah-e-zindagi mein taza-dam aata hun main

koi nazuk hath bazu tham leta hai mera

Thokaren khata to hun lekin sambhal jata hun main

apne miTne ka bhi gham hota hai is ehsas se

main nahin apna magar tera to kahlata hun main

hai suhani kis qadar un duriyon ki chandni

puchh leta hai koi 'zaidi' to itraata hun main