aisi tanhai mein ab rang jamaya jae

aisī tanhā.ī meñ ab rang jamāyā jaa.e

shāḳh-e-sidra pe parinde ko biThāyā jaa.e

maiñ agar harf-e-ġhalat thā to likhā hī kyoñ thā

likh diyā hai to ḳhudārā na miTāyā jaa.e

pahle kahte the mohabbat hai to Darnā kaisā

ab ye kahte ho tamāshā na banāyā jaa.e

vo mahak hai to use saañs meñ mahsūs karo

vo badan hai to use haath lagāyā jaa.e

'ishq hai 'ishq ye shatranj nahīñ hai sāhib

mujh payāde ko na ḳhāne se haTāyā jaa.e

rā.egāñ honā hī likkhā hai agar vaqt 'azīz

kyā ye mumkin hai tire saath gañvāyā jaa.e

vo mire haal se andāza lagā legā kabhī

kyā zarūrī hai use 'ishq jatāyā jaa.e

apnī āvāz se Dar lagtā hai mujh ko 'anjum'

varna jī chāhtā hai shor machāyā jaa.e

aisi tanhai mein ab rang jamaya jae

shaKH-e-sidra pe parinde ko biThaya jae

main agar harf-e-ghalat tha to likha hi kyon tha

likh diya hai to KHudara na miTaya jae

pahle kahte the mohabbat hai to Darna kaisa

ab ye kahte ho tamasha na banaya jae

wo mahak hai to use sans mein mahsus karo

wo badan hai to use hath lagaya jae

'ishq hai 'ishq ye shatranj nahin hai sahib

mujh payaade ko na KHane se haTaya jae

raegan hona hi likkha hai agar waqt 'aziz

kya ye mumkin hai tere sath ganwaya jae

wo mere haal se andaza laga lega kabhi

kya zaruri hai use 'ishq jataya jae

apni aawaz se Dar lagta hai mujh ko 'anjum'

warna ji chahta hai shor machaya jae