aisi uljhan ho kabhi aisi bhi ruswai ho

aisī uljhan ho kabhī aisī bhī rusvā.ī ho

dil ke har zaḳhm meñ dariyāoñ sī gahrā.ī ho

yuuñ guzarte haiñ tire hijr meñ din-rāt mire

jaan pe jaise kisī shaḳhs ke ban aa.ī ho

phuul kī misl sabhī daaġh mahakne lag jaa.eñ

kaash aisā bhī kahīñ tarz-e-masīhā.ī ho

kaisā manzar ho ki sar phoḌte dīvānoñ ke

sañg ho haath meñ aur sāmne harjā.ī ho

vo suḳhan-var jo suḳhan-var haiñ haqīqī sāhab

aise logoñ kā kabhī jashn-e-pazīrā.ī ho

hai mizāj apnā alag apnī tabī.at hai judā

kaise is daur ke logoñ se shanāsā.ī ho

chaa.e kā cup ho 'nabīl' aur kisī kī yādeñ

raat kā pichhlā pahar ālam-e-tanhā.ī ho

aisi uljhan ho kabhi aisi bhi ruswai ho

dil ke har zaKHm mein dariyaon si gahrai ho

yun guzarte hain tere hijr mein din-raat mere

jaan pe jaise kisi shaKHs ke ban aai ho

phul ki misl sabhi dagh mahakne lag jaen

kash aisa bhi kahin tarz-e-masihai ho

kaisa manzar ho ki sar phoDte diwanon ke

sang ho hath mein aur samne harjai ho

wo suKHan-war jo suKHan-war hain haqiqi sahab

aise logon ka kabhi jashn-e-pazirai ho

hai mizaj apna alag apni tabiat hai juda

kaise is daur ke logon se shanasai ho

chae ka cup ho 'nabil' aur kisi ki yaaden

raat ka pichhla pahar aalam-e-tanhai ho