aisi waisi pe qanaat nahin kar sakte hum

aisī vaisī pe qanā'at nahīñ kar sakte ham

daan ye faqr kī daulat nahīñ kar sakte ham

ik 'adāvat se farāġhat nahīñ miltī varna

kaun kahtā hai mohabbat nahīñ kar sakte ham

kisī tā'bīr kī sūrat meñ nikal aate haiñ

apne ḳhvāboñ meñ sukūnat nahīñ kar sakte ham

isti'āroñ ke takalluf meñ paḌe haiñ jab se

apne hone kī vazāhat nahīñ kar sakte ham

shāḳh se toḌ liyā karte haiñ aage baḌh kar

jin kī ḳhush-bū pe qanā'at nahīñ kar sakte ham

be-ḳhabar yuuñ ki har ik baat ḳhabar lagtī hai

bā-ḳhabar aise ki hairat nahīñ kar sakte ham

aisi waisi pe qana'at nahin kar sakte hum

dan ye faqr ki daulat nahin kar sakte hum

ek 'adawat se faraghat nahin milti warna

kaun kahta hai mohabbat nahin kar sakte hum

kisi ta'bir ki surat mein nikal aate hain

apne KHwabon mein sukunat nahin kar sakte hum

isti'aron ke takalluf mein paDe hain jab se

apne hone ki wazahat nahin kar sakte hum

shaKH se toD liya karte hain aage baDh kar

jin ki KHush-bu pe qana'at nahin kar sakte hum

be-KHabar yun ki har ek baat KHabar lagti hai

ba-KHabar aise ki hairat nahin kar sakte hum